رسالة الى :
السيد وزير الداخلية:
السيد وزير الماليــة:
كل من يهمه الأمــر:
.
- ذهبت اليوم لتجديد رخصة القيادة الخاصة بى فى مرور التجمع الثالث
طلبوا شهادة المخالفات استخرجتها والعسكرى اللى بيوزع الشهادات اخد اللى فيه النصيب فقالى دى بعشرين جنيه دفعتها (بدون ايصال).
- بدأت الإجراءات فطلبوا 230 ج للكشف الطبى (وماخدتش ايصال) ودخلت كشفت (كشف تهريجى).
- خرجت لاستكمال الإجراءات فطلبت الموظفة 150 جنيه مقابل ملف ورق واستمارة وصورة بطاقة فذهلت ورفضت وقولتلها هشترى انا من الكشك .. فكانت الطامة الكبرى .. لقيت صورة الأستمارة (ورقة واحدة) بـ 101 جنيه .. آه والله 101 جنيه ثمن تصوير ورقة واحدة فزعقت بعلو صوتى أحنا كده بنتسرق فين رئيس الوحدة .. قالى أحمد بيه هناك أهو ..
- ذهبت للرائد أحمد ماهر قائد وحدة المرور فقولت له ورقة الأستمارة ب101 جنيه؟ قاللى : آه قولت : ورقة تصوير من ماكينة تصوير ب101 جنيه وملف ورق وصورة بطاقة ب47 جنية يعنى أجمالى 148 جنيه؟ قاللى آه ... قولتله طب انا عايز ايصال؟ قاللى : مفيش ... قولتله هدفع بس لازم أعملكم فضيحة .. ولا عبرنى وانما أرسل موظف كبير فى السن لتهدئتى.
- تركته واستكملت المهزلة وأتصورت أسوء صورة ممكنة وروحت أدفع تانى فلوس بالفيزة 545.40 جنيه ثم طلب 80 جنيه كاش وأعطانى ايصال ب36.50 جنيه (تخيلوا المهزلة).
وأستلمت رخصتى وحييت السيد الرائد أحمد ماهر أللى عامل يافطة لنفسه على الرخصة كما بالصورة.
.
ولكم أن تتخيلوا ياسادة كم النهب والسرقة من أشخاص يفترض انتماؤهم لوزارة الأمن والإنضباط وحماية الشعب من اللصوص والحرامية والفاسدين :
ماتم دفعه لشهادة المخالفات= 20 جنيه
ملف بـ 148 بدلا من 15 جنيه = 133 جنيه
فرق ال 80 جنيه عن الإيصال = 43.5 جنيه
الإجمالى المسروق من فرد واحد = 196.5 جنيه تحت سمع ومباركة السيد الرائد أحمد ماهر
ولك أن تتخيل تواجد عدد 1000 مواطن للتجديد = 196500 ألف جنيه أى مايقرب من 200000 ( مائتى ألف جنيها مصريا) دول ممكن يتعملوا فى يومين !!!!! وطبعا لا أحدثكم على استخراج الرخصة لأول مرة ولا حرج ..!!
.
السيد المحترم وزير المالية: هل يتم تقاضى أى اموال بدون ايصال بقيمة المبلغ تماما؟؟؟
السيد وزير الداخلية : أعرف تاريخك المشرف كضابط وتاريخك الرائع وزيرا للداخلية خلال هذه السنوات ...
- سيدى الوزير لو كان الرائد أحمد ماهر على حق فستكون وزارة الداخلية وكرا دون قيد لكل موظف فاسد ينهب أموال المواطنين كيفما شاء ويجب عليك أن تستقيل ليأتى من يضبط هذه المنظومة المتردية فى وحدات المرور .
- وان كان الرائد أحمد ماهر متجاوزا تعليمات الوزارة فيجب أن يحاكم ويعزل ويتم تشديد التعليمات فالأرقام مذهلة وتعد بالملايين شهريا ..
.
أنتظر ردكم وسأصعد هذه الشكوى الى ماشاء الله حتى أعرف رد سيادتكم
.
المواطن/ عماد الدين محمد فهمى