الجمعة 21 نوفمبر 2025 - 05:20 م

---

عبر ربيع ياسين نجم الأهلي السابق، عن غضبه الشديد لعدم الاستعانة به في مجال تدريب منتخبات الناشئين خلال السنوات الماضية.

وقال ربيع ياسين في تصريحات إعلامية:" أنا مفيش حد في ضهري، غير ربنا، كله بياخد فرص إلا ربيع ياسين، دا بيخيروهم ها تحب تبقى مدير فني ولا مدير كرة ولا مدير رياضي، طيب وربيع ياسين بكل تاريخه، أنا أسطورة ولو كنت أخدت فرصتي في التدريب كان زماني في حتة تانية".

وأضاف: "قبل كدة قررت أعمل معسكر في الصعيد لمنتخب الشباب، قالولي هنسافر طيارة قلتلهم ليه طيارة، هنسافر بالأوتوبيس، احنا عملنا إيه أو اللاعيبة دي حققت ايه عشان أسفرهم بطيارة للصعيد".

وتابع: "لما اللاعيبة دي تديلك حاجة تديها مقابلها، دول لسه ولا هم أسماء ولا حققوا حاجة، أنا بازرع فيهم حاجة تانية قوة التحمل والرجولة والشقى، وأنا أهو راجل كبير وهسافر معاك وهتعب معاك، اللاعب المصري وهو صغير لازم تعوده على الشقى".

وأضاف: في نهائي أفريقيا للشباب، كنت جايب واحد بينام في الطرقة للاعيبة، جالي قالي أنا مش قادر أسيطر اللاعيبة برضه بتطلع من الغرف، روحت مصلي الفجر وجايب البطانية ونايم أنا فالطرقة وقلتلهم الراجل بقى يطلع من أوضته".

وأردف:" كان في أوضة طالبة حاجات ساقعة وشيبسي ، خبطت عليهم خايفين يفتحوا، نزلت جيبت الكارت بتاع الأوضة وفتحتها عليهم، مكنش ينفع أعمل غير كدة ، أنا وصلت نهائي مينفعش أفرط فيه، وعقلية اللاعب المصري لو اتغيرت كل حاجة هتتغير، مكنش عندي مشكلة أتمرمط عشان خاطر المنتخب".

---

---